*光頭媽媽日誌*

今日我被委派照顧一個有腦退化症的八十五歲婆婆，一同參加教會的長者旅行團。

一早，婆婆已來到，介紹後我們一整天都在一起，有影皆雙。這是上天安排的一課。

一開始，婆婆就自我破冰，跟我激掌，講咗幾句⋯⋯仲錫咗我一啖，我心諗：咩料呀婆婆⋯⋯

車程中，佢又嘖我，又摸我塊面，又搞呢搞路⋯⋯但我一點不動氣，佢好似一個4歲嘅小朋友，好想同你玩，好想聊你⋯我就係咁被佢玩咗一程車。如果嗰個係我個仔，我一早叫停咗佢，因為好煩，因為好唔耐煩，因為好憫憎⋯⋯

全程，婆婆一係拖住，一係撟住，一係抆咗我手臂，抆住我啲鬼鼠肉，因為佢雙腳唔好，坐得耐再行會痛、上落樓梯唔夠力，要用嚟借力⋯⋯如是者過咗7個鐘。如果嗰個係我媽媽，我甩開咗佢好耐，因為好攰， 因為好煩，因為好熱，因為好燥⋯⋯

然後，我問自己，點解對住一個陌生婆婆，你可以嘻嘻哈哈被佢玩一程車；你可以由佢拖住你、抆住你，而你繼續微笑相待？係因為你知道呢個係短暫嘅任務？因為你知道你無何推搪？因為你知道你可以贏得別人嘅讚賞，係度搶光環？

我只知道，對於最親的人，我們往往如此「不近人情」，是否值得大家三思？

共勉。

網上圖片

（本文獲光頭媽媽日誌授權轉載）