*光頭媽媽日誌*
好喇，究竟點樣樣去令自己身心平衡呢？
自確診到家陣我都做咗好多唔同嘅嘢，有啲好容易做到，有啲有啲難度，有啲我都唔係好乖咁做⋯⋯
1. 食：
－ 轉食有機食物：喂！好貴㗎喎！
妖！貴得過你條命？貴得過你用條命去博？
我幫襯嘅係本地有機農場，有人會話你點知佢真係有機，唔知㗎，勝在感覺良好，食得安心，食得放心；比起你食住無機，同自己講無事嘅無事嘅，我覺得比較心安。而我上網買嘅呢，係合各個本地農場嘅產品，又溝淡齋買一個農場產品嘅風險。
－吓？咁唔駛出街食呀？咁我就梗係有出街食啦！屋企煮嘅就盡力有機健康，出街喇喎，咁就有QUOTA食吓啲無咁健康㗎囉！
－咁都真係有啲嘢我係唔食嘅：出街唔食雞。唔飲含白糖嘅飲品，但我好間中會偷飲一啖可口可樂同一啖出前一丁⋯⋯一啖，堅係一啖，俗語話：一啖砂糖一啖屎，原來係有根據⋯⋯你自己上網查查⋯⋯
－ 唔食嘅：合成肉，罐頭，奶（但Raw cheese, Raw butter are all good), 砂糖，有化學物嘅食物都盡避，生三文魚我都盡戒。
－ 華記農場豬，有機雞，牛，豬我都食食食食食
2. 用
－ 避用含化學物嘅產品：牙膏，沖涼，洗頭，洗面，護膚，化妝，防曬、洗碗，洗地，洗衫等等等
－駛唔駛咁誇？不如你問吓啲生產商冋化學品駛唔駛咁狼死⋯⋯咁重手！
－邊避得咁多？避唔晒㗎！咁你避唔避就係好個人嘅⋯⋯無何以阻到你⋯⋯
－有啲我自己做到嘅我都會自己做⋯⋯除非懶！洗手液、面霜、body lotion/cream, loose powder, sunscreen我都做過！洗厠所嘅我都自己整過！
－有咩我一定唔用？vaseline, 有SLS嘅產品：好多都有：例如洗頭水、洗手梘液、洗潔精！
－自然療法嘅食品、補充劑、醫療級嘅精油、中醫都係我會用嘅產品同supplements
以上都係講緊點樣可以控制自己個INPUT，減低"吸毒"同毒素積儲喺身體⋯⋯下回再講排毒。打風，大家保重！
圖片來源：http://www.driver8agency.com/…/…/12/15/its-all-about-balance
（本文獲光頭媽媽日誌授權轉載）
We Care We Love Better 