康復者一定要戒口？

所以其實我都冇咩特別戒口，當然你知我係大膽個批啦。我覺得就算珍珠奶茶幾咁無益、出前一丁幾咁邪惡，間中食一次半次係唔會即刻死嘅。所以心血來潮想食嘅話我都係會去食。

話說上年唔知痴咗邊條線，突然間話唔食肉就即刻可以唔食肉，但係如果全素純素，唔食魚、唔食海鮮，我就唔得啦⋯⋯於是呢一整年裏面，我就淨係食蔬菜蛋魚同海鮮，成年其實都冇咩特別感覺。直到最近去咗一次韓國旅行，嚟咗一次大解放後，再食返肉，朋友就同我講我面色唔同咗。之前唇色嘅瘀瘀黑黑冇咗，咁我自己都覺喎。

原來我就咁食魚海鮮，而唔食肉，對我身體來講應該係太過寒涼，食返肉呢一個月裏邊，我又真係覺得自己冇咁怕凍喎，仲有返以前對手好熱嘅感覺，我個仔直頭話我隻手暖到好似暖水袋，可唔可以幫佢敷下個肚仔。

講咗咁長，其實我都係想話比大家知，其實戒唔戒口，食啲乜嘢，其實唔係人哋話俾我哋知，因為只有自己嘅身體，先係最知道自己需要啲乜嘢。

唔係人人話嗰樣好就係嗰樣適合你，自己唔試過係唔知，身體發出信號：一粒暗瘡、一舊眼屎、一次便秘、定係口臭、身痕，其實可能佢都係有啲嘢想同你講，想你注意一下，如果你唔理佢，身體就會繼續不停掙扎，直至有一日敗壞。

早抖。