*光頭媽媽日誌*

網上瘋傳一個男人，坐住輪椅上車，但落車後可以健步如飛咁推住輪椅行。我沒有看過內文，也沒有睇過條片，但大家的反應，但大家心中所想，其實有係咪事實嘅全部呢？

我無辦法知道個男人究竟係咩情況，事實又係點。

我只係想話俾大家知，其實，我都有領取傷殘津貼。

當時病友同我講，病人可以找醫院的社工（我唔記得係咪福利局定咩社工），填張表，佢就可以幫你搞手續，當然要醫生簽名，再要去新蒲崗唔知做咩手續就可以。視乎情況，醫生會批你可以享有一、兩年的津貼，之後會再根據你嘅病況續，或者停。而津貼嘅金額都有唔同，又視乎你嘅情況、嚴重程度、時間等等

而領取咗傷殘津貼之後，你仲可以申請埋$2搭巴士地鐵、傷殘人士泊車位（要有張證先可以泊㗎嘛！），但我就無申請呢個部份⋯⋯

講咗咁耐，又唔係特別詳細要介紹大家要申請，更唔希望大家有機會申請。

我只係想話，其實好多嘢，睇表面係唔會知，尤其係而家嘅資訊流通咁快，個個都係鍵盤戰士，個個可以論斷人家嘅時代。

何況傷殘係未必有樣睇！情況好似唔通我生CANCER，做完化療好攰，然後喺地鐵坐咗個關愛座，我要攞個病樣同光頭出嚟俾你睇，證明我有資格坐咩⋯⋯； 唔通我有咗四個月，唔係好大個肚，又要心口掛住張醫生紙證明我大肚唔係大肚腩咩⋯⋯

個男人係咪呃人我唔知，只係有感而發，廢話完畢，多謝收睇。

VISUAL：downloaded from Council of Europe: the international day of person with disabilities.

（本文獲光頭媽媽日誌授權轉載）