提及癌症，人人生畏。著名DJ森美近日在節目中重提3年前的可怕經歷，事關他當年接受牙醫檢查，發現口腔內疑似患有黑色素瘤（皮膚癌的一種），而以往患有此症的人士之中，50%活不過兩年。幸好，經過數星期的化驗後，報告結果顯示色素瘤屬於良性。至此之後，他定期檢查身體，亦開始審視自己的需要並重新規劃人生，決定多花時間陪伴子女。

霎時再感動︳森美重提19年口腔患色素瘤爆喊 囡囡一句話頓悟為父真正「責任」

原文轉載自：晴報

森美擔任最新一集《霎時再感動》的嘉賓，重提 2019 年拍攝《娛樂大家》期間，到牙醫檢查時發現口腔內患有色素瘤（皮膚癌的一種），有 50% 患者活不過兩年，他在化驗報告之前不敢向家人透露。想不到回家後同囡囡一段對話，頓悟出做爸爸的真正「責任」，重新規劃人生。

森美稱疫情前1、2年去睇牙，牙醫朋友睇完同佢講：「你口腔入面有撻黑色嘅嘢，好可能係色素瘤，要驗一驗。」對方加多句「得閒約啲同學出嚟食吓飯。」他直覺事情並不單純，驚恐地回家上網查資料，「原來色素瘤好似皮膚癌，但係喺口腔入面就好罕有，有50%人係活唔過兩年。當時心入面就諗，真係活唔過兩年咁點呢？嗰幾個禮拜重新思考我自己嘅人生…」

在收到化驗報告之前，森美如常返無綫拍攝《娛樂大家》，繼續笑面迎人，「喺廠大家玩得好開心，仲要派禮物畀觀眾，每次派嘅時候我冇傷感嘅，只係覺得我仲可以帶歡樂畀觀眾幾耐呢？返到屋企時唔敢同屋企人講，尤其仔女，驚佢哋擔心，所以擔張凳坐喺門口睇佢哋做功課，佢哋覺得好奇怪…記得嗰時囡囡問我『爸爸做咩坐喺嗰度睇我做功課』，咁我就話『我想睇你做功課』…」

森美說到此時在鏡頭前爆喊，哽咽稱：「有一樣嘢成日覺得，如果我唔喺度嘅話，應該有啲嘢要教我啲仔女，我冇時間教…點算呢？我就問囡囡『有啲咩想Daddy教你㗎』，跟住佢話『冇呀，你陪我食飯就得嘞』…囡囡呢句說話，正係一個爸爸喺屋企需要做嘅嘢，而唔係教佢哋幾多嘢囉，可能係同佢哋坐低食餐飯就夠…好開心就口喺幾個禮拜之後，得出結果係色素瘤係良性，暫時就冇事。自此之後對我自己嘅人生規劃都有唔同。過咗幾年之後，越嚟越知自己需要啲乜嘢，我唔係需要錢，唔係需要工作，唔係需要教自己小朋友啲咩，係需要佢哋嘅陪伴，因為佢哋都需要我嘅陪伴，希望大家都搵到需要嘅嘢。」

森美今日透過短訊回覆《晴報》，現時有做定期檢查，沒有甚麼大問題，「都係平日小心啲check，尤其身體有冇咩地方有啲黑色素，例如痣或癦，有時腳趾啲位，有時會喺啲自己睇唔到嘅地方，盡量去check，check唔到都冇辦法。（同家人一齊睇節目？）仔女就冇乜理我，太太就叫我冇咩就唔好成日喊…我真係感動，佢話男人大丈夫唔好成日流淚，好似好弱，叫我呈現剛強一面。（有同仔女提及患病一事？）同小朋友冇乜提過，嗰時有同爸爸媽媽講，冇事時就食餐飯，大家關係好啲，以後見多啲，跟住就爆發疫情，個個禮拜一齊食飯，家庭聚會就必然。」