*光頭媽媽日誌*
光頭媽媽被處方三隻化療藥去搞掂我隻瘤。
我唔會搞得清邊隻打邊隻。
第一回化療後嘅基本反應：
即時：好攰、好眼瞓。
即晚：好攰、好眼瞓。無胃口。
第一星期：
好攰、好眼瞓。無胃口、少少肚疴、口乾、都係好攰。頭皮有啲痛，但你摸佢先痛，唔搞佢、瞓覺時都唔痛。
但體重就因為肚疴同無胃口大跌！平時減肥一定一定一定無咁快！
仲有呢就係比較容易怕凍，要戴定帽同頸巾出街。媽媽話最緊要唔好吹親條頸喎！
第7-10日：
無咁攰喇，精神、胃口都慢慢恢復。食多啲食多啲食多啲！疴少咗，但有肚痛、喉嚨痛、食道痛。仲有生暗瘡：係下巴位置，應該係因為有毒素係肝。仲有開始有頭瘡，好似生暗瘡咁。
仲有：生咗一粒飛滋同刷牙流牙血。
之後嘅反應，都只有減少，無增多或令我太痛苦，總括而言都頂得住。當然，要家人照顧同他們滿滿的愛！
第11日：
戲肉。當我賺回胃口約埋朋友去私房菜，食得開心，傾得慶起之際，回程之時，頭痕痕，就係我第一次甩頭髮嘅時候。其實，甩頭髮嚟講，就算你明明有晒心理準備，到嚟料嗰一刻，仍然係好震撼嘅。但我又覺得，我所鋪排嘅甩頭髮之路係可以參考吓嘅，大吉利是！
（本文獲光頭媽媽日誌授權轉載）
We Care We Love Better 